“အဲဒီ့အရပ်မှာ ကြယ်တွေလင်းစေသား”

“အဲဒီ့အရပ်မှာ ကြယ်တွေလင်းစေသား”

ကျွန်တော်ဟာ ငယ်ငယ်ကတည်းက ကောင်းကင်ပေါ်က ကြယ်လေးတွေကို စိတ်ဝင်တစား ငေးမော ကြည့်ခဲ့ဖူးတယ်။
အိပ်မပျော်တဲ့ညတွေပဲဖြစ်ဖြစ် ၊ အိပ်ပျော်တဲ့ညတွေပဲဖြစ်ဖြစ် ... ထက်ကောင်းကင် အာကာပြင်ကိုမျှော်ကြည့်မိတိုင်း ဟိုးခပ်ဝေးဝေးက ကြယ်လေးတွေကိုမြင်မိတယ်။
သူတို့တွေကိုမြင်တိုင်း စိတ်ထဲမှာ တစ်စုံတစ်ရာကို တွေးဖြစ်ခဲ့တယ်။ ကြယ်တွေ ဘာကြောင့် လင်းတာလဲ။ ဘာကြောင့် မိုးပေါ်မှာပဲ နေတာလဲ။

ကလေးဘ၀က ရင်းနှီးကျွမ်းဝင်ခဲ့တဲ့ Twinkle Twinkle Little Stars ကဗျာလေးကို တစ်ခါပြန်လည် ရွတ်ဆိုလိုက်တယ်။
“မှိတ်တုတ် မှိတ်တုတ် ကြယ်လေးတွေ . . . မှိတ်တုတ် မှိတ်တုတ် ကြယ်လေးတွေ” ကျွန်တော် စဉ်းစားတယ်...ကြယ်တွေ ဘာကြောင့် ဖြစ်တာလဲ။
နောက်ပြီးတော့ ကျွန်တော်လည်း ကြယ်လေး တစ်လုံးဖြစ်ချင်တယ်။ ဘယ်လိုပုံနှယ် ဖြစ်ခွင့်ရမလဲ။

ကြယ်လေးတွေက သစ္စာရှိကြတယ်။ ကြယ်လေးတွေက ရဲရင့်ကြတယ်။ သူတို့ရဲ့ ပိုင်ဆိုင်သမျှအားတွေနဲ့ သူတို့ရဲ့ အမိကောင်းကင်ကြီးကို ပေးဆပ်ကာ အလင်းဓါတ်တွေပေးကြတယ်။
ကြယ်လေးတွေက ကောင်းကင်ထဲမှာ နေကြတယ်။ ကြယ်လေးတွေက ကောင်းကင်ထက်က ကြွေကျတယ်။ အဲ့လိုကြယ်လေးတွေ ဘယ်မှာရှိလဲ။
ကောင်းကင်ထဲမှာပဲ တွေ့နိုင်တော့မှာလား။ ကောင်းကင်ထဲမှာပဲ ကြယ်လေးတွေရှိကြတာလား။

                    *       *       *         *       *       *

ကြယ်ပန်းလေးတွေ ပျိုးခဲ့သလိုပဲ .... ရိုးရိုးလေးနဲ့ တိုးလို့ မက်ခဲ့တဲ့ သူတို့ရဲ့ အိပ်မက်လေးတွေက STA တဲ့ဗျာ။ သူတို့အားလုံးက ကောင်းကင်ထက်က ကြယ်တွေလိုပဲ။
မှိတ်တုတ် မှိတ်တုတ် လင်းတာမျိုးမဟုတ်ဘဲ .... ဗြောင်ဗြောင်တင်းတင်း ထွန်းလင်းခဲ့တယ်။ သူတို့ အားလုံးမှာလည်း ကောင်းကင်ပြင်ရှိတယ်။
သူတို့ အားလုံးမှာလည်း အမိရင်ခွင်ရှိတယ်။ အဲဒီ့အရာ သူတို့အားလုံးချစ်တဲ့နေရာ ၊ သူတို့အားလုံးခင်တွယ်တဲ့နေရာ ၊ သူတို့အားလုံးရဲ့ကောင်းကင်ပြင်ဟာ STA ပေါ့။

STA ဆိုတာ Save The Aged ( သက်ကြီးရွယ်အိုစောင့်ရှောက်ရေးနှင့်ထောက်ပံ့ရေး ပရဟိတလူငယ်များ အသင်း ) ပါဗျာ။
သူတို့ကောင်းကင်ကြီးဟာ သူတို့ရဲ့ အိပ်မက်ဖြစ်တယ်။ သူတို့ကောင်းကင်ကြီးဟာ သူတို့ရဲ့ မျှော်လင့်ချက်ဖြစ်တယ်။
သူတို့ကောင်းကင်ကြီး လှပအောင်လည်း သူတို့တွေ ကြိုးစားကြတယ်။ သူတို့ ကောင်းကင်အတွက်တော့ သူတို့ဟာ အဖြည့်စွက်ခံ ကြယ်ပွင့်လေးတွေ ဖြစ်ပါစေ...ကျေနပ်နေကြသူတွေ ပါလေ။

သူတို့ရဲ့ အလင်းဓါတ်လေးတွေကြောင့် သူတို့တွေရဲ့ ကောင်းကင်ပြင်ကြီးကလည်း ဖွေးဖွေးဖြူလို့ ထွန်းလင်း နေတယ်။ အဲဒီ့ကောင်းကင်ကြီးကြောင့် အဲဒီ့ကြယ်လေးတွေထွန်းလင်းသလို ၊
အဲဒီ့ကြယ်လေးတွေကြောင့် အဲဒီ့ကောင်းကင်ကြီး လှပနေတာပေါ့။

ပြောရရင်... ငွေကြယ်ပွင့် သူရဲကောင်းလေးတွေဟာ သူတို့ရဲ့ STAကောင်းကင်ပြင်ကြီးကို ပေးဆပ်၊ကာကွယ် စောင့်ရှောက်နေကြတယ်။
အဲဒီ့ကောင်းကင်ထဲမှာ သူတို့ချစ်တဲ့ ကိုယ်စားမိဘတွေရှိတယ်။ အဲဒီ့ကောင်းကင်ထဲမှာ နွမ်းပါးချို့တဲ့သူတွေရဲ့ သောကအပူတွေရှိတယ်။
အဲဒီ့ကောင်းကင်ထဲမှာ (STAဘိုးဘွားရိပ်သာဖြစ်မြောက်ဖို့)အနာဂတ်ရည်မှန်းချက်တွေရှိတယ်။ အဲဒီ့ကောင်းကင် ထဲမှာ လူသားဆန်တဲ့စိတ်ထားတွေရှိတယ်။
အဲဒီ့ကောင်းကင်ထဲမှာ ဗြဟ္မာစိုရ်နှလုံးသားနဲ့ကိုယ်ချင်းစာတရားတွေ ရှိတယ်။ အဲဒီ့ကောင်းကင်ဟာ မွန်မြတ်တဲ့စိတ်ထား ကရုဏာတရားတွေနဲ့ ရှင်းသန့်စွာထွန်းလင်းနေခဲ့တယ်။

တစ်ချို့ကြယ်လေးတွေက ညအခါမှ တွေ့မြင်ရတယ်
တစ်ချို့ကြယ်လေးတွေက လသာမှ တွေ့မြင်ရတယ်
တစ်ချို့ကြယ်လေးတွေက ခဏတာသာ တွေ့မြင်ရတယ်
( ပြီးရင် မြေပြင်ပေါ်သက်ဆင်းလို့ ကြွေကျသွားကြတယ် )
ဒါပေမယ့် Save The Aged ထဲက ကြယ်လေးတွေက ဘယ်သောအခါမှ
မမှေးမှိန်သွားအောင် တောက်ပ ၀င်းထင် ထွန်းလင်းနေကြတယ် . . .

ဆိုပါစို့ . . . STA ဟာ ကောင်းကင်ပြင်တစ်ခုဆိုရင် အဲ့ဒီအရပ်မှာ တန်ဂိုကြယ်တွေ ၊ ဓူဝံကြယ်တွေထက် ... ကိုယ်ပိုင် အဆင်း ၊ ကိုယ်ပိုင်အချင်း ၊ ကိုယ်ပိုင်အလင်းနဲ့ ထွန်းလင်းမယ့်
ကြယ်ကလေးတွေ အများကြီး
( အများကြီး ) ရှိဖို့လိုပါလိမ့်မယ်။ ကောင်းကင်ယံမှာ တစ်ပွင့်တည်း လင်းတဲ့ ကြယ်က ထွန်းလင်း တောက်ပတယ် ဆိုရင်တောင် အစီအရီလင်းတဲ့ ကြယ်တွေကြောင့်သာ အာကာပြင်ကြီးလှနေမှာပါ။
ကောင်းကင်ပြင်လှပဖို့ဆိုတာ ကြယ်တွေ များများ လင်းဖို့ လိုအပ်တယ်... ဒါ့ကြောင့်  အဲ့ဒီ အရပ်မှာ ကြယ်တွေ(များများ) လင်းပါစေသား . . . ။


STA ( ၃ ) နှစ်ပြည့် အမှတ်တရ
မိုးစွတ်နေ
22.12.2012 ( Sat: )
10 : 59 A.M.


မှတ်ချက် ။   ။ Save The Aged သက်ကြီးရွယ်အိုစောင့်ရှောက်ရေးနှင့်ထောက်ပံ့ရေး ပရဟိတလူငယ်များအသင်း၏ ၃ နှစ်ပြည့်အမှတ်တရ ဂုဏ်ပြုရင်း . . .

www.savetheaged.ning.com